Эндигина 21 баҳорни қарши олган бу ёш хонанданинг ҳаёти унинг мухлислари учун ҳақиқий эртак бўлиб туюлиши мумкин. Аввалига «Супер келинчак», сал ўтмай «Сайдинг қўябер сайёд» деб номланган хит-тароналарни ижро этган Зиёда мухлислар олқишидан илҳом олдими «Эй муҳаббат» деб номланган қўшиқни ижро этди. 

Ва бу билан ўзига билдирилган ишончни яна бир марта оқлади. Бир жуфт қўшиқ куйлаб, бир марта интервью бериб, ўзини «юлдуз»лар қаторига қўшиб қўйганлардан фарқли ўлароқ Зиёда ҳали ҳануз ўзидаги беғуборлик ва соддалик ҳислатларини йўқотмаган…

- Зиёда, вилоятлар бўйлаб уюштирилган гастрол сафарларидан яқинда қайтганингиздан хабаримиз бор. Янги «Супер келинчак» деб номланган альбомингиз ҳам сотувга чиққанига ҳали кўп вақт бўлгани йўқ. Энди қандай янгиликлар устида бош қотираяпсиз?
- Гастрол сафарларидан олам-олам таассурот олиб қайтдим. Вилоятлардаги мухлисларимизнинг бизга бўлган ишончи, ҳурмати бизни янада кўпроқ шижоат билан ишлашга ундаяпти, десам янглишмайман. Шу кунларда «Баҳор» номли янги қўшиқ ёзиб, унга клип суратга олиш билан бандмиз.
- Баҳор ҳам яримлаб қолганда, бу фасл ҳақида қўшиқ куйлашга қарор қилганингиз боисини билсак бўладими?
- (Кулади) Тўғрисини айтсам, қўшиқ матни ва мусиқасини ёзиб қўйганимга анча бўлганди. Лекин бошқа зарур ишлар чиқиб қолгани туфайли, бу ғоямни амалга оширишга мана энди имкон топилди.
- Гастрол сафарларидан олам-олам таассурот билан қайтдик, дедингиз. Балки бирон қизиқарли воқеани эслаб ўтарсиз?
- Тўғрисини айтсам, ҳар бир гастрол сафарларимиз саргузаштларга бой кечади. Келинг, энг ёдда қолганини айтиб берақолай. Чунки ҳаммасини бир бошдан ҳикоя қилиб берсам, суҳбатимиз фақат шу билан ўтиб кетиши мумкин. Ангрен шаҳрига гастрол сафарини уюштирганимизда саҳнага чиқиб берилиб ашула айтаётган вақтим микрофоннинг сими чиқиб кетди. Роса ноқулай вазиятга тушиб қолганман, аввалига нима қиларимни билмай довдираб қолдим. Энг қизиғи, томошабин бу ҳолатни табиий қабул қилди, ҳеч ким устимдан кулгани йўқ. Лекин мен роса уялганман. Вазиятдан қўшиқни микрофонсиз жонли ижрода куйлаб чиқиб кетганман.
- «Супер келинчак» фильми учун куйлаган саундтрекингиз жуда омадли чиқди. Уни куйлаш таклифини сизга ким ва қачон билдирган?
- «Супер келинчак» фильми суратга олинишидан сал олдин режиссёр Баҳром ака Ёқубов «Акфа Медиа»га келиб, қўлимга сценарий тутқаздилар. «Мана шуни ўқиб кўринг-чи, сизга ёқадими» дедилар. Кейин «Фильм учун айнан сиз саундтрек куйлашингизни хоҳлайман» деб қўшимча қилдилар. Сценарийни ўқидим, менга жуда ёқди. Биласизми, қўшиқнинг шеър ва мусиқаси шу пайтнинг ўзида туғилди.
- Саундтрек эфир юзини кўрганидан сўнг ортингиздан «Супер келинчак!» дея бақириб қоладиганлар кўпайди…
- (кулиб)Вой, худди шундай. Лекин ҳозир кўпроқ «ана, эй муҳаббат келаяпти» дейишади.
- Қўшиқ айтиш, умуман «мен қўшиқчи бўлишим керак» деган фикр хаёлингизга қачон келган?
- Қўшиқ куйлашни беш ёшимдан бошлаганман. Биринчи марта Юлдуз Усмонованинг «Баланд шохда» қўшиғини куйлаганим ҳеч кўз олдимдан кетмайди. Алифбе байрамида ҳам синфдошларим, уларнинг ота-оналари қаршисида учта қўшиқни куйлаб берганимдан кейин ота-онам «шу қизимизда санъатга иштиёқ кучли, истеъдод борга ўхшайди» деган ўй билан мени «Тантана» гуруҳига аъзо қилиб келишган. Ўша гуруҳда таҳсил олиб, мана бугун «Акфа медиа»да ижодимни давом эттираяпман.
 - Муҳаббат ҳақида савол берсам…
- (шошиб)Севмаганман…
- …дейишингизни биламан!  
- Лекин муҳаббатга ишонаман! Қанақа қилиб ишонасиз, деган савол туғилмаслиги учун айтиб ўтаман: севишиб турмуш қурган дугоналарим бор. Улар ҳозир бахтли ҳаёт кечиришмоқда. Тўғрисини айтсам, уларга жуда хавасим келади.
- Совчилар остонангиздан аримай қолди, деб эшитдик, шу ростми?
- Совчилар… эшик қоқишаяпти, жуда ҳам кўп улар. Лекин… ҳали турмушга чиқмайман.
- Уларга рад жавобини бераяпман денг?
- Билмадим, бу рад этишга кирмаса керак. Шунчаки ростини айтиб қўя қолишаяпти уйдагилар. Яъни «қизимиз ҳали кўп ижод қилиши, кўп қўшиқлар куйлаши керак» деб. Ота-онам ҳам кўнглимга қарашаяпти. Шу боис бор фикру-хаёлимни ижодга қаратганман. Турмуш қуришга эса улгураман… 
- Сиз-ку улгурарсиз, сингилларингизчи? Ёки улар сиздан олдинроқ турмушга чиқишларига рози бўласизми?
- Ҳм… Бу ҳақда ўйлаб кўрмаган эканман.
- Санъат соҳасини танлаган инсон шахсий ҳаётни халқдан яшириб бўлмаслигини тез тушуниб олади. Сиз мана шундай гоҳида ёқимсиз туюладиган ҳолатга тайёрмисиз? 
- Бошида мен ҳақимда ошкор бўлишини хоҳламаган нарсаларни ёзишганларида роса жаҳлим чиқарди, ҳатто йиғлаган пайтларим ҳам бўлган. Энди эса бепарво бўлишни ўргандим. Нима ҳам дердим… Майли, ёзаверишсин.
- Ўзингиз ҳақингизда эшитган энг сўнгги миш-миш?
- Зиёданинг тўйи бўлибди, деган гап-сўзлар. Юқорида айтиб ўтганимдек, ҳали турмуш қуриш ҳақида ўйлаганим йўқ.
- Мақом йўналишида бир-биридан гўзал тароналарни ижро этдингиз. Мухлисларингизга мақом тарихидан озроқ гапириб беринг.
- …
- Ким туртки бўлди шундай йўналишда қўшиқ куйлашингизга?
- «Акфа-Медиа» компанияси раҳбари Жаҳонгир ака. Бир куни ёнларига чақириб, «Қизим, шу қўшиқни ижро этиб кўринг» дедилар. Куйлай олармикинман, деган ҳавотир ҳам бўлди бошида. Куйлаб кўрдим, баҳони мухлислар беришади. Агар хатоликлар ўтган бўлса, минг бор узр сўрайман.
- Қандай чолғу асбобларини чалишни биласиз? 
- Фортепианони. Унчалик яхши бўлмаса ҳам, лекин биламан.
- Зиёда, агар ҳаётингиз мультфильмга айланиб қолганида, қайси персонаж бўлиб қолишни хоҳлардингиз.
- Оппоғой. Мана шу мультфильм қаҳрамонини болалигимдан яхши кўраман.
- Хонанда бўлиб танилишингизга беминнат ҳисса қўшиб келаётган инсонлар билан танишувингиз қандай кечган?
- Коллежда таҳсил олаётганимда «Акфа-Медиа»да ёш истеъдодларни кашф этиш мақсадида кастинг уюштирилаётгани ҳақида эшитиб қолдим. Кастингдан ўтаман деган фикр хаёлимда ҳам йўқ эди. Бордим, қўшиқ куйладим ва… синовдан ўтдим. Дадамлар ўқишга киришимга зўрға рухсат берган эмасми, уйга борганимда роса тўполон бўлган. «Ҳеч қачон санъаткор бўлмайсан, эсингни еб қўйибсан сен қиз. Ҳали рухсатимсиз ҳар-хил танловлардан ўтиб келадиган бўлдингми» деб роса койиганлар. «Дада, мен дарс бўладими деб боргандим, шунақа бўлиб қолди» десам ҳам «Йўқ, барибир рухсат бермайман, бориб уларга айтиб келасан» деганлар. Кейин онамларни ўртага қўшиб, кўндиришга киришганман. Ҳатто, йиғлаб ҳам берганман. Охири «дада, қадамимни тўғри босаман, ҳеч қачон юзингизни ерга қаратмайман» деганимдан сўнг ҳар бир босаётган қадамимни назорат қилиб бориш шарти билан рози бўлганлар. Ростини айтсам, дадамларнинг бу қаттиққўлликларини жуда ёқтираман.

- Ижод, гастрол сафарлари, турли учрашувлар, суратга олиш майдончаси… Бундай кун тартибига эга қиздан уй юмушлари борасида савол бериш ноўрин бўлса керак?
- Ҳар доим улгураман демайману, ҳар якшанба уй юмушлари учун вақт ажратишга ҳаракат қиламан. Уйларни тартибга келтириш, таомлар пишириш жону-дилим.
- Охирги марта метрога қачон тушдингиз?
- Адашмасам… уч йил олдин. Лекин метрони жуда соғинганман.
- Машҳурликнинг ёқадиган ва ёқмайдиган томонлари?
- Ёқмайдиган томони йўқ. Шу соҳани танладимми, охиригача ҳаммасига чидамли бўлишга ҳаракат қиламан.
- Машҳурлик дўстларингизнинг сизга бўлган муомаласини ўзгартирадими?
- Ўзгартирди. Бирон ютуққа эришганингизда ёки бошингизга иш тушганида сизга ким дўст ёки дўстмаслигини билиб олар экансиз.
- Ютуғингизга қараб ўз қиёфасини ўзгартириб турадиганларга муносабатингиз қандай бўлади?
- Мендан юз буриб кетган собиқ дўстларим билан юзма-юз келиб қолган тақдиримизда, ҳар доим улар билан сўрашаман. Чунки мен қандай бўлсам шундайлигимча қолганман.

 

Қисқа саволларга лўнда жавоблар:
- Сумкангизнинг ичида нима бор?
- Қиз болага керакли ҳамма нарса: тушь, упа, лаб бўёғи, телефон…
- Севимли либосингиз?
- Жинси ҳамда классик услубда тикилган либослар.
- Автомобил ёки мотоцикл?
- Автомобил.
- Ҳаётдаги шиорингиз?
- Фақат олдинга интилиш!
- Ким билан дуэт куйлашни орзу қиласиз?
- Турк мега-юлдузи Ибраҳим Татлисес билан.
- Хатоингиз?
- Хато қилмаганман.
- Севимли спорт турингиз?
- Теннис.
- Севимли китобингиз?
- Муҳаммад Юсуфнинг шеърий китоблари.
- Севимли фильмингиз?
- «Келинлар қўзғолони».
- Эрталаб кўзгуга қараганингизда хаёлингиздан қандай гап ўтади?
- Бугун кайфиятим аъло, дейман.
- Ўзингизда нимани ўзгартиришни хоҳлардингиз?
- Ҳеч нарсани.
- Энг гўзал аёллар орасида кимга ўхшашни хоҳлагансиз?
- Шри Девига. У жуда чиройли аёл.
- Ўзбек актёрлари орасида кимлар билан суратга тушишни орзу қиласиз?
- Лола Элтоева ҳамда Мурод Ражабовлар билан. Мана шу икки актёр ота-онам образини ижро этишларини жуда-жуда хоҳлайман.
- Қариб қолишдан қўрқасизми?
- Қариб қолишдан ҳамма қўрқса керак?
- Ёшартирувчи кремларга ишонасизми?
- Кремларга аллергияси бор деб ўйламангу, лекин умуман ишонмайман.
- Ўзингизни қачон бахтли ҳис қиласиз?
- Кимгадир ёрдамим тегса.
- Сартарошхонага тез-тез бориб турасизми?
- Салонга ҳафтада уч марта бораман.

Ma'lumotlar www.7x7.uz saytidan olingan.